MUNDO SEFARADÍ:
La odalisca Madame Mili
Por Graciela Tevah de Ryba

Muevamente el penserio me se torna al ”Kafe Izmir“. En otra okasión vosh dishe ke era vishitado por omvres. Las tadres djugaban tavle, pastra i loba, endjunto al kafisiko, ke no manke. Por las notche el Izmir se trokaba en fiesta, enmientras ayegava la ora de la bailarina. Los musafires pasaban el tiempo  tomando rakí, akompaniado por los mesés ke servían; guevos jaminados, alzetunas, pipinos, keso, rabanitos i pitas. Albojer, patrón del kafé parado detrás del mostrador metía para embelekar a los musafires  musiká grega i turka. 

            Ama oy, kero avlarvos de la afamada odaliska Madam Millí. Era ardjentina, nasida en Buenos Ayres  en el kuartier de Colegiales ande moravan i ainda moran djidiós, de Turkía i Rodas Madam Milí era alta i lusia, de puerpo kon lindas formas para  embelekar bueno,  kon  ojos pretos almendrados resaltados ainda mas por el kojol ke se etchaba i largas pestañas, klaro afilu, la boyá kolor preta le ayudava! La shastra ke le kuzía los fostanes i ropas de menester savía bien komo atakanarla i lo ke le akisheava  para lusir  su  puerpo bien formado para menearse.

            Por todos era konosida en el kuartier, merkava los djenerós en el magazín de Nisim Yohai  en  la avenida Korrientes afilu  las gasas, los tules i sedas ke tenía de menester para los trajes de odaliska, ama  las piedras, kanutiyos  i lentejuelas los merkava en el magazín  de los ermanos Albala. Al terminar shabat, por las notches bailaba  en el Izmir i vo a  kontarvos lo ke akontesió una vez. Komo dishe  antes ke la odaliska baile, avía  musiká grega i turka, ambientaba mijor djunto a un rakí, ke munchos se tornaban preto kandil de beverlo. Esa notche avía mabulaná de musafires del kuartier i otras partes de la civdad asperando ver a la afamada madam  Milí.

            Estaba  don Yako el  ke arreglaba  chapines i chismés, el kalailadji don Liachón,  vizinos de las kalejas i famiyares. Asta el medikó de los chitkitikos, nadie kerya  pedrerse la  odaliska. Los chalguiguies estaban prontos i asentados kon el kanún, lúd i dumbelek, kuando ampesaron a tanyir, eya asperaba detrás del perdé rosho. Kuando salió, ampesó a bailar. ¡Entresalidos estavan todos viendo kon ke grande estilo  se meneaba, kaderas manos i brasos yenos de manyas. Las gasas ke se iba kitando volavan enmientras iba entre las mesas kisdryando a los musafires, Vosotros savesh de meterle parás  en la frente i...ande se pueda. En súpito, Moshon Sadrinas grande bailarín se alevantó de la siya, se alympió la sudor de la kara, se atakanó la gravata   i asiendo ekilibrio kon una boteya en el meoio, tomó dos kucharas a modo de kastaniuelas asiéndolas sonar, pishín pishín se metió delantre de Madam Millí i se etchó a bailar kon eya.

            La djente estava alokada, ampesaron a dar palmas kon manos i pieses, algunos kon los pirones en los platos al ritmo de la orkesta, i Arari el musikó arabó en el úd ke tanyia kon las manos komo dos palombas envolando.

            Muntcho le plazió a Madam Millí danzar kon Moshón Sadrinas, el era bailarin profesional i gostaba de tornar al Izmir para bailar otra vez kon eya.

    Esto  ke akontesió esa notche, kedó komo sinial de lo bueno ke se pasaba una notche djunto a Madam Millí  en el afamado kafé  Izmir.