MUNDO SEFARADÍ:
El tango i los djidios
Por Graciela Tevah de Ryba

Nasí i me engrandesí en Villa Crespo kuartier de  Buenos Ayres, sivdá kapitala de la Ardjentina  a la ke yaman kapitala del tango, i me se vino las ganas de kontarvos lo akontesido un día busaná de invierno kon fríos de murir, ande kalía ver la eskarcha en las zanjas de las kalejas por los  grandes fríos de esos dyas.

Eran tiempos ke fraguavan las kazas bashas i largas, kon las  kamaretas  saliendo al kurtijo, a la fondo las kuzinas, eskusados i un pedaziko de tierra no mankando algún  arvolé de limones , naranjas o iguera, algunas plantas i flores, ansina  era el modo ke moravan partajando la kaza  varias famiyas, las ke agora son bushkadas para morar yamándolas kazas chorizo.

En este modo de kaza en la kaleja Malabia kasi eskina Corrientes, moravan Elias Calomite i José Arrochas,  kon sus famiyas i afilú kon las esfuegras,  komo tantas djentes eran mui gostosos del tango, tinían dos ijos varones kada uno i dninguna mujer, ama  kuando podían i la okasión les permitía, se fuían al Bar Viktoria de la avinida Corrientes kasi Serrano a sintir a las alabadas orkestas i kantaderos de tango afamados i a la moda de esos momentos.

Las dos famiyas ese dya, estaban aprontándose  para ir al teatro …..¿ya están imajinando a kual teatro ?....si …al Teatro Goyescas,  a sintir a la manseba kantadera ardjentina Lolita Torres , espesialista de kantes espanioles  ke asía entresalir  a las djentes kon su musikalidá, voz  i simpatía.

Calumite i Arrochas bushkavan por el kuartier entero en ke sitio estaban sus djovenes ijos, aprontados i asiéndose la ora de dolashear al Goyescas salieron  a bushkarlos, … ¿ande estaban?,….estavan komo lokos ke  asta le demandaron al polís de la eskina  ke los konosía si no los tenya visto, i este kontestó ke no los tiene vido pasar, … ansina se izo la ora de salir i no los enkontravan, a lo ke  iniervosos djunto a una angusia grande serraron  las kamaretas i salieron a la kaleja a tomar el tranvía 7, para  viajar asta el teatro sitiado en  el sentro de la siuvdá.

Los mansebos trankilos  i contentes,  estavan asentados en el bar “ La Pura”,  enfrente del Victoria  kon Nisim Aruj, kompaniero de lavoro tomando un kafisiko, enmientras avlavan de kuala orkesta i kantante sintirían mas tadre.

Estaban atakanados a la franka moda de esos tiempos, kon trajes merkados en la shastrería en la casa “ Muñoz”  donde un peso vale dos, peinados kon jopo kon   gomina Brancato lo ke agora yaman gel, perfumados kon kolonia  La Franko Inglesa,  grevata de seda natural de la Londra, chapeo i pardesiú de París  i chapines pretos de la Italia lustrados con pomada  Kovra.

Ama esa noche ansina akontesió: entraron temprano al “Bar  Victoria”, bushkando  buenos sitios en la primera fila, se asentaron  i pidieron serveza,  kuando  el  garsón se las trusho a la mesa , ….¿ ken se imagina ke orkesta entrava?.... djusto era  el momento  kuando  ampezó a tanyr  la orkesta de Julio de Caro violinista, direktor i kompositor alabado i afamado  por sus tangos  Malevo , Boedo i Chiclana  kale dizir ke el maestro De Caro tynía un estilo de orkestar mui bueno, deshando kontetes a las djentes ke lo sintían i seguían sus aktuasiones en los sitios ke lo kontratavan.

Kada tango ke eskapava las djentes aplaudían bueno,  a lo ke  la kalor del lugar iba subiendo ainda más, enmientras se asperaba la entrada de la proksima orkesta, a la  fondo del bar,  abía una glorieta i debasho de esta ambezaban a bailar kon dos profesores alabados del kuartier para esto, ¡ kalía ver a mansebos i grandes puerpo kon puerpo, kara kon kara meneando las patchás al kompás de esta grande musiká siudadana, asta algunas mujeres  se etchavan en derredor del garón un paniuelo rojo, se boyadavan los mushos i las karas para estar igualas komo akeyas mujeres arrabaleras, …. para deskansar del baile  tornavan a sus sitios  enmientras  asperavan la entrada de la proksima  orkesta.

En esa okasión, la  mabulaná de djentes presentes  iban diziendo ke era una notche espesial, agora asperavan la entrada de un grande del tango …..yo les vo a dizir era…. Osvaldo Pugliese i su orkesta, nasido en Villa Crespo alabado pianista i kompositor, ke asía poko tiempo abía  estrenado el tango  “La Yumba”  ke tanta  fama le trusho, enmientras los musikós kon los violines i bandoneones se iban asentándose i aparejavan los atriles kon las musikás, las djentes iban gritando “La yumba maestro , la yumba “ …...Pugliese pidió  silensio kon la mano siedra, ama el publikó seguía gritando “La Yumba maestro , La Yumba ,  se alevantó del piano akomodándose los anteojos i mirando al publikó  disho :... kon el pedrón de los amigos presentes, este tango vo a dedikarlo  a donia Alegra Jabif,  vizina de mi kurtijo ke atenta siempre está kuando me asento a tanyr i lavorar en el piano, eya ajarva la puerta de mi kamareta trayéndome en el platiko blanko, boios de aselga  kon guevo jaminado resién salidos del orno, lo mesmo aze kuando elabora baklavá i mostachudos no manka nunka de kumvidarme.

¿Pueden imajinarse los gritos de ese momento?, ...la mayoría de los musafires eran djidiós de la Turkía i sabían de kualo Pugliese  avlava ¿kualo ke les diga?...se iban alevantando de las siyas etchando gritos komo lokos ke firían el meoio...djusto en ese minuto entraron Arrochas i Calumite,  ke abían avoltado del Goyescas  i ¿ kualo ven? : los ijos tomando serveza Palermo kon maníses,  papas fritas i asta  fumando sigarros Avanti merkados en el magazin Federico de la avinida Corrientes i Serrano la tadre anterior.

Pokas mujeres gostavan de la serveza , algunas tomavan  granadina kon soda refresko de moda, ama los iniervos de estos omvres fueron mui grandes de ver todo lo ke akontesía i solo una kosa izo ke se kalmaran, antes ke eskape la notche, … entraba la orkesta de Anibal Troilo “ Pichuko”....¡adió santo, kualo son estos  alokados  gritos de las djentes...amán, amán! , el bar se vinía abasho.

Los omvres demudados i kayados se asentaron al lado de los ijos a sintir al godro Pichuko, ke  tomó la siya asentándose  delantre de la orkesta kon el bandoneón, ijos, padres i todas las djentes ponían  atansión del modo komo Pichuko iba avriendo i serrando los ojos  enmientras tanya en el bandoneón  sus  tangos:  María, Che Bandoneón i  Pa ke bailen los muchachos para serrar la nochada.

Lo bueno ke enmientras las orkestas i kantaderos  tanyan, las djentes azían silensio  embelekándose i disfrutando de esta  grande musiká siudadana .

El fumo, la serveza  i la golor de los sigarriyos, asían ainda más el ambiente arrabalero en el Bar Victoria , ke durava  asta las primeras oras de la maniana en ke kada uno tornaba a sus kazas, algunos pretos kandil de tomar mabulaná de serveza la noche entera .

Arrochas i Calumite, asperaron salir a  la kaleja para echarles unos kuantos gritos a los ijos, firiendo los meoios asta de akeyos ke kaminavan por la kaleja, estos arrabiados  en súpito arespondieron: nasimos en Villa Crespo kuartier arrabalero de tango i Arroyo Maldonado ¿ kualo ke agamos?...   en la pelukería, magazines, kaleja i bares se siente  tango ,dunke  en  muestras  kasas sintimos muestros kantes sefaradíes de boka de muestras madres i avuelas , semos gostosos del tango.
 Entiende,  tenemos en la sangre meoio i el puerpo al tango, esa fue la razón de ir  al bar Victoria esta noche, agora no mos digan ni una biervo más porké ustedes mesmos vinieron a sintir a estos grandes de la musiká siudadana....

En este punto,  los padres kedaron kayados kon la kaveza en basho sin dizir   ni un biervo más de lo akontesido.

A la semana enviniente, las djentes komentavan de otros sitios para bailar i sintir otras orkestas , pero la vedrá De Caro, Pugliese i Pichuko  fueron i son ainda los grandes del tango.

Dunke no están más en este mundo kon mosotros, mos siguen akompaniando  kon los diskos ke kada uno i uno tenemos en las kazas algunos konservados komo tresoros, komo  kale dizir ke no manka dningún turist  de merkar algunos de eyos.

La mujer de Anibal Troilo “ Pichuco,  Hilda “Dodoo” Karachi , konosida komo Zita , era sefaradí de la isla de Rodhas.   Ase pokos anios fraguaron un monumento a Osvaldo Pugliese en la eskina de Caning i Corrientes kon la orkesta  i el asentado en el piano, malorozamente ajasharon este kitando a Pugliese del piano, despúes de un tiempo aze pokos dyas metieron otra vez a Pugliese al piano , arreglaron el monumento en  un rekonosido i djusto omenaje del Governo de la Sivdá .

Desde Villa Crespo barrio de tango vos saludo a todos kon los akordes del candombe de Alberto Castillo: siga ,  siga , siga el baile en la tierra que nasí.