Komunicado del CIDiCSef
Federación Sefaradó de Latinoamérica (FeSeLa)
2004: ANYO DE MAIMONIDES
CIDiCSef yama a su komemorasion en el ochen sentenario de su muerte

Leerlo (meldarlo) en Español

Buenos Aires, 10 fevrero 2003

Rabí Moshé ben Maymón (1135-1204), konosido komo MAIMONIDES, o por su inisialas ebreas RAMBAM fue el filósofo, médiko, djurista i sabio más renomado del djudaízmo medieval, i una de las mayores glorias de la umanidad.

La UNESCO, en su sesión 120 del 1984, ya senyaló ke Maimónides "lavoró en la unión de las grandes sivilizasiones de su tiempo i realizó una sovresaliente kontribusión al diálogo de kulturas" i en otro páragrafo de la sesión se índika: "Maimónides, un djudió, ke bivió en el mundo árabo, ke su lavoro publikado en árabo, fue imediatamente tradusido al ebreo i ke sus ideas apartienen a la erensia kultural de la umanidad".

En el anyo 2004 se kumplirán ocho siglos de su muerte, i el CIDICSEF dechizó de enkargarse de sentralizar i difundir, en todo el kontinente amerikano, la informasión sovre las aktividades ke tendrán lugar i se proyektarán, promoviendo la komemorasión de este aniversario en todos los ámbitos edukativos i institusionales.

El atadijo del Sentro de Investigasión i Difuzión de la Kultura Sefaradí kon la ovra de Maimónides tiene su prinsipio kon la kreasión de esta entidad. El CIDICSEF organizó, tanto en Buenos Aires komo en otras sivdades de Amérika, expozisiones sovre Maimónides; editó el kuartén volumen de "Sefárdica" enteramente dedikado al ilustre pensador, promovió investigasiones i prezentó konferensias sovre este tema. Tiene además una kompleta dokumentasión sovre de él. En el 1985, i grasias a la djestión de CIDICSEF FeSeLa, fue metido el nombre de Maimónides a la plasika portenya situada en Avda.Córdoba y Uriburu.

En konkordansia kon esta trayektoria, el CIDICSEF formará i meterá en akto, en todo el kontinente, un plano de aktividades ke inkluya, entre otros, los sigientes objektivos:

• Promover la impozisión del nombre del insinye savio a kayes, paseos públikos, ets.
• Tomar la inisiativa de la kreasión de kátedras kon su nombre en diversos sentros akadémikos.
• Realizar simpozios sovre su vida i ovra.
• Promover la reedisión de sus ovras.
• Yamar a konkurso para la prezentasión de eskritos sovre el savio (en formato de ensayo, poema, teatro, ets.)

Por su parte, CIDICSEF se akomete a:

• Dar su asesoramiento a las institusiones edukativas i sientífikas ke desidan de okuparse de esta transendente komemorasión
• Dar la posibilitá de realizar konsultasiones en su biblioteka i videoteka.
• Difundir todas las inisiativas i evenimientos ke rezultarán, dando en munchos kavzos la posibilitá de artikulasión de propostas.

Resivimos konsejos, adeziones i proyektos en:

Salguero 758, Ciudad de Buenos Aires (1177)
Teléfono: +54-11-4861-0686
E-mail: cidicsef@ciudad.com.ar
KONSULTE MUESTRA PÁJINA: http://www.cidicsef.org.ar

CIDICSEF invitará a los organizmos internasionales de kultura i, spesialmente, a institusiones i privatos ke azen parte de otras konfesiones, a partisipar a la komemorasión, dedikando el anyo 2004 a la memoria del savio

El CIDICSEF tendrá el grande plazer de pasar a la Prensa los materiales ke se refieren a este evenimiento.

Leerlo (meldarlo) en Español